Tones: M = mid, HR = high-rising, H = high, HF = high-falling, LF = low-falling
| Isaan | Pronunciation | Tones | Thai | English/Notes | #occ |
|---|---|---|---|---|---|
| ข้างหน้า | kha:ŋ-na: | LF-LF | ข้างหน้า | in front, forward | 39/23 |
Link to overview page
Link to dictionary
Basic vocabulary — page 20 — Series A, pictures 01-03: to pull, toy car, dog
2 หมาน้อยกำลังดึงเขาไปข้างหน้า
3 เขากำลังดึงเซียก
Basic vocabulary — page 22 — Series A, pictures 15-18: eye, to look, to close the eyes
16 เขากำลังแนมไปทางซ้าย
17 เขากำลังหลับตา
18 เขากำลังแนมขึ้นไปเทิงๆ
Basic vocabulary — page 22 — Series B, pictures 19-20: to throw and catch a ball
เด็กน้อยคนนี้กำลังเฮ็ดหญัง เด็กน้อยคนใส่เสี้ยสีซมพูนี้เขากำลังเฮ็ดหญัง เขากำลังโญนลูกบอน
เขากำลังโญนลูกบอนไปข้างหน้า
เขาใซ้มือของเขา ออกแฮงจากมือของเขา แล้วกะโญนลูกบอนไปข้างหน้า
20
เด็กน้อยคนนี้เขากำลังเฮ็ดหญัง เด็กน้อยคนใส่เสี้ยสีฟ้าๆ นี้เขากำลังเฮ็ดหญัง เขากำลังฮับลูกบอน
เขาใซ้มือสองข้างของเขาญกมือขึ้น แล้วเขากำลังฮับลูกบอน
Basic vocabulary — Page 30 — Series B, pictures 04: poor, rich
คนหนึ่งกะเป็นคนจน แล้วคนจนหนิ เป็นหญัง เขา เฮาคือฮู้ว่า เขาคือคนจน หลือว่าเขาเป็นคนจน กะฮู้ได้ว่ามีพุซายคนหนึ่งกำลังนั่งขอทานอยู่ มีหมวกใบหนึ่งเอาวางไว้ข้างหน้า แล้วกะญกมือไหว้พ้อม บ่งบอกถึงกานขอทาน หลือว่ากานขอเงินของพุอื่น หลือว่ากานขอในสิ่งต่างๆ ที่เจ้าของบ่มี
แล้วเขาขอทานอยู่ใส เขาอาดสิขอทานในสะถานที่ต่างๆ ที่มีคนญ่างผ่าน หลือว่าคนญ่างไปมาเนาะ
แล้วอีกคนหนึ่ง พุซายอีกคนหนึ่ง ฮู้ได้จั่งใดว่าเขาคือคนลวย หลือว่าเขาเป็นคนลวย เขาบ่ได้เป็นคนจน กะฮู้ว่าจากกานแต่งโตของเขาแล้ว กะฮู้ได้เลยว่าเขาอาดสิเป็นคนมีเงิน หลือว่าเป็นคนลวย มีถานะพอปะมานจักหน่อยว่า เบิ่งจากกานแต่งโตของเขาแล้ว เบิ่งมีพูมถานดูดีเนาะ ใส่เกิบผ้าใบ ใส่สูด ใส่แว่นตาอี่หยังแล้ว เบิ่งซงแล้วกะคือสิเป็นคนลวย อาดสิบ่แม่นคนขอทานดอกเนาะ ขั้นเบิ่งลูบลักหน้าตาแล้ว
Basic vocabulary — page 22 — Series B, pictures 15-18: eye, to look, to close the eyes
นี้คืออี่หยัง อันนี้เป็นตา อันนี้เป็นตาของคน
อยู่ในตากะสิมีน่วยตา น่วยตาสิเป็นสีดำ
ตาของคนสิเป็นสีขาว แต่ว่าน่วยตานั้นสิเป็นสีดำ
ตานี้ไว้ถ้าแนม ตาสามาดแนมได้ซู่อย่าง
ขั้นคนเฮาบ่มีตา กะบ่สามาดแนมได้ บ่สามาดเห็นฮุ่ง แนมอี่หยังกะบ่เห็น
ขั้นคนตาบอด กะบ่สามาดแนมเห็น บ่สามาดแนมได้จักอย่าง
แล้วพุซายคนนี้กำลังมืนตาอยู่ เขากำลังแนม กำลังแนมไปข้างหน้า
16
เขากำลังเฮ็ดหญัง เขากำลังแนม กำลังแนมไปทางซ้าย
กำลังแนมไปทางซ้ายอยู่ แต่ว่าเขาแนมอี่หยัง เขาใซ้ตาสองข้างของเขานั้นหละ กำลังแนมไปทางซ้ายอยู่
17
เขากำลังเฮ็ดหญังอยู่ เขากำลังหลับตา เขากำลังหลับตาอยู่
ขั้นคนหลับตาอยู่ หลือว่าหลับตาอยู่หนี้ สิบ่สามาดแนมอี่หยังเห็น หลือว่านอนหลับ
ขั้นคนนอนหลับกะสิหลับตา แล้วกะบ่สามาดแนมอี่หยังได้จักอย่าง กะคือหลับตาอยู่ ตาเฮากะสิปิด หลือว่าบ่ได้ใซ้งานตาแล้ว
18
เขากำลังเฮ็ดหญัง เขากำลังมืนตา
พุซายคนนี้เขากำลังมืนตาอยู่
เขาอาดสินอนตื่นแล้ว หลือเซาหลับตาแล้ว เขากะเลยมืนตาขึ้น เพื่อที่สิสามาดแนมได้ซู่สิ่งซู่อย่าง หลือว่าแนมเห็นได้ทุกสิ่งทุกอย่าง
Basic vocabulary — page 13 — Series B, pictures 05-07: leg, foot, knee
นี้คืออี่หยัง นี้คือขา ขาของคน
ขาของคนมีสองข้าง ขาแต่ละข้างกะสิมีส่วนปะกอบหลายจุดหลือหลายอย่าง ขาข้างหนึ่งกะสิมีหัวเข่าพ้อม มีตีนพ้อม มีตุ้มม้องพ้อม แล้วกะสิมีนิ้วตีนพ้อม
นิ้วตีนแต่ละข้างสิมีห้านิ้ว หนึ่งขากะสิมีห้านิ้ว อีกหนึ่งขากะสิมีห้านิ้ว
แล้วกะสิมีเล็บตีนพ้อม เล็บตีนสิมีอยู่ซู่นิ้ว
แล้วใต้สุดของขากะคือตีน แล้วกะสิมีฝ่าตีนพ้อม
ขาของคนเอาไว้เฮ็ดหญัง ขาเอาไว้ถ้าญ่าง ซู่คนสิมีขาเอาไว้ถ้าญ่าง
ขั้นบ่มีขากะญ่างบ่ได้ สัดกะคือกัน ขั้นสัดบ่มีขากะญ่างบ่ได้
ขั้นมีขากะสิญ่างได้ แต่สัดบางโตกะบ่มีขา แต่กะสามาดคานไปข้างหน้าได้
6
นี้คืออี่หยัง นี้คือตีน ตีนของคน
มีวงเล็บสีแดงวงอยู่ตีนของคน
นิ้วตีนกะสิมีนิ้วพ้อม มีนิ้วห้านิ้ว มีเล็บพ้อม
เขาใส่เกิบบ่ บ่ เขาบ่ได้ใส่เกิบ เขามาตีนเปิ่ม บ่มีเกิบเลย บ่ได้ใส่เกิบมาจ้อย
7
นี้คืออี่หยัง นี้คือขา
มีลูกสอนสีแดงซี้ไปใส่หัวเข่าของเขา อันนี้กะสิเป็นหัวเข่า อันที่ลูกสอนซี้เข้าไปกะสิเป็นหัวเข่า
หัวเข่ากะสิสามาดพับได้ เป็นข้อต่อที่สามาดนั่งได้ เฮาสินั่งพับเพียบ หลือนั่งอี่หยังกะได้ เพาะว่าหัวเข่านี้มันงอได้ หลือพับได้
Basic vocabulary — page 07 — Series B, pictures 06-08: chicken, to run, to eat
นี้คืออี่หยัง นี้คือไก่
ไก่มันเป็นอี่หยัง ไก่มันเป็นสัด
ไก่มันโตใหญ่บ่ บ่ ไก่มันโตบ่ใหญ่ ไก่มันโตพอดี
ไก่มันโตสีหญัง ไก่มันโตสีเหลียง
ไก่มันมีขาบ่ มีอยู่ ไก่มันมีขา
ขาไก่มันใหญ่บ่ บ่ ขาไก่มันบ่ใหญ่
ไก่มันมีปีกบ่ มีอยู่ ไก่มันมีปีก
ไก่มันมีปีกจักข้าง ไก่มันมีปีกสองข้าง
ไก่มันบินได้บ่ บินได้อยู่ แต่ว่าบินได้บ่สูง บินบ่สูงคือนก
ไก่มันมีปากบ่ มีอยู่ ไก่มันมีปากแหลมๆ
ไก่มันมีหงอนบ่ มีอยู่ ไก่มันมีหงอนไก่
หงอนไก่มันสีอี่หยัง หงอนไก่มันสีแดง
7
ไก่มันกำลังเฮ็ดหญัง ไก่มันกำลังแล่น
ไก่มันแล่นไปใส ไก่มันอาดสิแล่นไปข้างหน้า
คือลู้ว่าไก่มันกำลังแล่น กะลู้ เพาะว่าไก่มันแล่นแล้วมันเหยียบดิน ขี้ดินมันไง่ขึ้น
ไก่มันแล่นไปจักโต ไก่มันแล่นไปโตเดียว
ไก่มันแล่นเล็วบ่ บ่ลู้คือกันว่าไก่มันแล่นเล็วบ่ อาดสิแล่นเล็ว
8
ไก่มันกำลังเฮ็ดหญัง ไก่มันกำลังกินเญี่ย
ไก่มันกินเญี่ยอี่หยัง บ่ลู้คือกันว่ามันกินเญี่ยอี่หยัง อาดสิเป็นเข้ากะได้
ไก่มันกินเข้าอยู่ใส บ่ลู้คือกันว่าไก่มันกินเข้าอยู่ใส อาดสิกินอยู่เทิงพื้นขี้ดินกะได้
ไก่มันเล็วบ่ บ่ลู้คือกันว่าไก่มันกินเล็วบ่ อาดสิกินซ้า อาดสิค่อยๆ กินกะได้
Basic vocabulary — Page 29 — Series B, pictures 08-10: to study, book
เขากำลังเฮ็ดหญัง กะมีเด็กน้อยพุซายคนหนึ่งเนาะ อาดสิเป็นเด็กน้อย อันนี้ หลือว่าอาดสิเป็นพุใหญ่แล้ว กะบ่ฮู้จัก กะแนมบ่ค่อยซัดปานใดเนาะ แนมบ่ค่อยเห็น เขากำลังเฮ็ดหญังอยู่ เขากำลังเลียนหนังสืออยู่ นั่งโต่ะอยู่ นั่งเก้าอี้อยู่เนาะ แล้วกะนั่งอยู่โต่ะนั้นหละ นั่งอยู่ข้างหน้าพ้อมเด๊ นั่งกำลังเลียนหนังสืออยู่
เขาเลียนวิชาหญังตอนนี้ อาดสิเป็นคะนิดตะสาดเนาะ อาดสิเป็นคะนิด เลียนคะนิดอยู่ เห็นเขามีโตเลขหลายๆ อาดสิเป็นกานคำนวน กะสิเกี่ยวกับคะนิดตะสาด วิชาคะนิดสาดเนาะ
แล้วเขาเลียนอยู่กับใผ เขากะเลียน อาดสิอยู่กับหมู่ อยู่หลายคน แต่ว่าใน[ที่]เห็นอยู่ตอนนี้คือเขานั่งอยู่โต่ะพุเดียว หมู่อาดสินั่งอยู่[ข้างหลัง] อาดสินั่งอยู่โต่ะข้างหลังเนาะ
มือข้างขวากะจับปากกา กำลังเขียนอยู่สะหมุดหนังสือเขาอยู่เนาะ
9
เขากำลังเฮ็ดหญัง กะมีพุซายพุหนึ่งเนาะ ใส่เสี้ยสีเหลียง กำลังอ่านหนังสืออยู่ อาดสิตั้งใจอ่านหนังสือเพื่อที่สิสอบ หลือว่าอ่านหนังสือเพื่อทบทวนความลู้ หลือว่าให้มันมีความลู้ในสะหมองเนาะ
เขาอ่านหนังสือเกี่ยวกับวิชาหญัง เบิ่งลักสะนะแล้วอาดสิเป็นกานคำนวน วิชาคะนิดตะสาดเนาะ หลือว่าคะนิด หญังที่มันเกี่ยวกับคำนวน หลือว่าฟิสิก หลือว่าอี่หยังกะได้เนาะ
10
แล้วเขากำลังเฮ็ดหญังอยู่ มีพุซายพุหนึ่งเนาะ เขากำลังจับหนังสืออ่านอยู่
เขาอ่านอยู่กับใผ กะจักคือกัน อันนี้เฮากะบ่ฮู้เนาะ เขาอาดสิอยู่พุเดียว หลือว่าอยู่บ้าน หลือว่าอยู่ในห้องเลียนของเขา
Basic vocabulary — Page 33 — Series B, pictures 09-10: Where is? What time is it?
เขากำลังเฮ็ดหญังกัน มีพุหญิงกับพุซาย เขากำลังคุยกัน หลือว่ากำลังเว้ากัน
ในลูบพาบนั้นพุซายกำลังถามพุหญิงว่า โลงบานอยู่ใสคับ แถวนี้มีโลงบานบ่คับ ฮู้จักโลงบานบ่คับ ว่าโลงบานอยู่ใสคับ
พุหญิงอาดสิตอบว่า ฮู้จักอยู่จ้า โลงบานไปทางพุ้นจ้า โลงบานไปทางพี้จ้า โลงบานอยู่บ่ไกจากนี้ดอกจ้า
โลงบานอยู่ข้างหน้าเด้อจ้า โลงบานญ่างไปทางพุ้นเด้อจ้า
แล้วแต่ว่าเขาสิตอบแบบใด หลือว่าแล้วแต่ว่าพุหญิงสิตอบแบบใด ขั้นฮู้ว่าไปทางซ้าย กะตอบว่าทางซ้าย ขั้นฮู้ว่าไปทางขวา กะตอบไปทางขวาเนาะ
ขั้นฮู้ว่าต้องไปทางพุ้น ทางพี้ ทางนั้น กะอะทิบายให้เพิ่น กะเว้าให้เพิ่นฟังว่า ต้องไปจั่งซั้นจั่งซี้เนาะ
10
มีคนสองคน เขากำลังเฮ็ดหญังกัน มีพุหญิงกับพุซาย เบิ่งซงแล้ว พุซายอาดสิอยากฮู้เวลาว่ามันจักโมงแล้ว
อาดสิถามพุหญิงว่า ตอนนี้จักโมงแล้วคับ ตอนนี้จักโมงแล้วน้อ ฮู้จักเวลาบ่คับว่าตอนนี้จักโมงแล้ว ตอนนี้เวลาเท่าใดแล้วคับ ฮู้จักบ่คับ
อันนี้กะเป็นคำเว้าของคนที่ถาม อาดสิใส่ค้าหลือว่าใส่คับกะได้
แล้วกะคนตอบ อาดสิตอบไปว่า ตอนนี้เวลาเท่านั้นเท่านี้ สิบโมงแล้วจ้า เที่ยงแล้วจ้า ทุ้มหนึ่งแล้วจ้า หกโมงเซ้า เจ็ดโมงเซ้า หลือว่าเท่าใด แล้วแต่เวลาว่าตอนนั้นเท่าใดกะตอบไปตามเวลาเท่านั้น
เที่ยงกะตอบเที่ยง บ่ายกะตอบบ่าย ห้าโมงกะตอบห้าโมงเนาะ ว่าตอนนั้นจักโมงแล้ว เฮากะตอบไปตามที่เขาถามมาเนาะ
Basic vocabulary — page 11 — Series B, pictures 16-20: train, station, to arrive/depart, truck
นี้คืออี่หยัง นี้คือลดไฟ
ลดไฟกำลังแล่น ลดไฟกำลังแล่นไปข้างหน้า
มันแล่นอยู่เทิงลาง ลางของมันเป็นเหล็ก ลางของมันเฮ็ดจากเหล็ก ลดไฟกะเฮ็ดจากเหล็กคือกัน
ลดไฟขะบวนหนึ่งสิมีหลายซ้อง หลือหลายหม้องนั่ง ที่สามาดเฮ็ดให้คนนั่งได้หลายคน
17
ลดไฟกำลังเฮ็ดหญัง ลดไฟกำลังสิฮอดป้ายของมัน กำลังสิฮอดสะถานีลดไฟ มันกะกำลังสิจอด ขั้นมันฮอดแล้ว มันกะสิจอด
อยู่หม้องป้ายลดไฟ สิมีนาลิกาพ้อม เอาไว้ถ้าเบิ่งเวลา ว่าลดไฟคันนี้ สิมาฮอดป้ายจักโมงๆ
18
ลดไฟกำลังเฮ็ดหญัง ลดไฟกำลังจอดอยู่ป้าย กำลังจอดอยู่สะถานีลดไฟ ตอนนี้ลดไฟจอดอยู่
เป็นหญังลดไฟคือจอด จอดเพื่อที่สิได้ฮับ หลือส่งพุโดยสานขึ้นลงลดไฟ ขั้นพุใดสิไปข้างหน้ากะสิขึ้นลดไฟ ขั้นพุใดฮอดหม้องลงแล้วกะสิลงจากลดไฟนั้น
ขั้นพุโดยสานลงลดไฟเบิดแล้ว หลือพุโดยสานขึ้นลดไฟเบิดแล้ว ลดไฟกะสิออกจากป้ายนั้น หลือออกจากซานซาลานั้น
19
ลดไฟกำลังเฮ็ดหญัง ลดไฟกำลังออกจากป้ายลดไฟ ตอนนี้ลดไฟออกจากป้ายแล้ว
แล้วลดไฟสิไปใส ลดไฟกะสิไปข้างหน้า กะสิขี่ไปเลี้ยยๆ ไปป้ายข้างหน้า เพื่อที่สิไปจุดหมายหน้า
20
ลดไฟมันเกิดอี่หยังขึ้น ลดไฟมันขี่มาตำลดบันทุก หลือลดขนของ
มันตำกันแฮงบ่ ตำกันแฮงอยู่ คือสิตำแฮงบักคักหนึ่ง จนลดไฟตกออกจากลางเอาโลด
ขั้นลดไฟตำลดบันทุกแล้ว มันสิเสียหายหลายบ่ เสียหายหลายอยู่ เทิงลดบันทุกและลดไฟอาดสิมีความเสียหายหลาย แล้วทางในลดกะอาดสิมีพุคนบาดเจ็บ หลือคนเจ็บหนักกะได้
ลดไฟตกลางเลยแม่นบ่ แม่น ลดไฟขะบวนนี้ ตำลดบันทุก แล้วเฮ็ดให้ลดไฟตกลางเลย เบิ่งแล้วมันตาย้านหลาย ตาย้านบักคักหนึ่ง
Basic vocabulary — page 20 — Series B, pictures 01-03: to pull, rope, toy car, dog, tug-of-war
เขากำลังเฮ็ดหญัง เขากำลังดึงลด เป็นลดของเหล้น
เขาใซ้อี่หยังลาก เขาใซ้เซียก เขาดึงเซียกอยู่ เขาเอาเซียกมัดใส่ลดของเหล้นนั้น แล้วเขากะใซ้มือของเขาจับเซียกอันนั้น แล้วกะลากไป
ของเหล้นนี้กะเป็นลดของเหล้น เป็นลดของเหล้นเด็กน้อย ลดของเหล้นคันน้อยๆ ดอกว่า บ่สามาดขี่ได้ แต่ว่าสามาดเหล้นได้ ญู้เหล้น หลือลากเหล้นกะได้ สำหลับของเด็กน้อยเนาะ สำหลับของเด็กน้อยเหล้น
2
หมามันกำลังเฮ็ดหญัง หมามันกำลังดึงคนไปข้างหน้า
แล้วมันใซ้แฮงหลายบ่ จักคือกัน อันนี้กะบ่ฮู้คือกัน จักว่ามันใซ้แฮงหลายหลือบ่หลาย
แล้วพุใดไปก่อนไปลุน พุใดอยู่ข้างหน้า พุใดอยู่ข้างหลัง กะหมามันออกก่อน หมามันดึงคน แล้วคนอยู่ทางหลัง หมามันดึงคนไปข้างหน้า แล้วคนกะอยู่ข้างหลังหมา
ส่วนปะกอบของหมากะสิมีหลายอย่าง มีขาพ้อม กะมีขาหน้า ขาหลัง มีหู มีตา มีปาก มีดัง มีลิ้น มีสิ่งต่างๆ อีกหลายสิ่งหลายอย่าง
3
เด็กน้อยกำลังเฮ็ดหญัง เขากำลังดึงเซียก กำลังดึงเซียกไปทางหลัง
จักว่าเขาสิดึงเป็นหญัง เห็นแต่เขาใซ้แฮงดึงเซียกอยู่
ที่เขาดึงอยู่นั้นเป็นอี่หยัง เป็นเซียกแม่นบ่ แม่น เป็นเซียก เขากำลังดึงเซียก กำลังดึงเซียกอยู่
แล้วเขาใซ้แฮงหลายบ่ กะสิใซ้แฮงหลายเติบ เบิ่งซงแล้วเป็นตาใซ้แฮงหลายเติบ
แล้วที่เขาเฮ็ดอยู่นั้น ที่เขาเหล้นอยู่หนี้ เป็นกานละเหล้นแบบใด เป็นกานละเหล้นของอี่หยัง
อันนี้กะเป็นกานละเหล้นของเด็กน้อย หลือของพุใหญ่กะได้ เขาเอิ้นว่า เหล้นชักกะเย้อ เป็นเกมชักกะเย้อ เป็นเกมที่เหล้นของคนไทย คนอี่สานกะเหล้นได้ ซู่คนสามาดเหล้นได้
กะสิมีคนสองฝ่าย ฝ่ายหนึ่งอยู่ทางนี้ ฝ่ายหนึ่งอยู่ทางนั้น แล้วกะดึงเซียกกัน พุใดดึงซะนะ พุนั้นกะสิเป็นพุซะนะ
พุซะนะกะคือว่า ฝั่งใดที่ดึงเซียกได้หลายกว่า หลือดึงเซียกแฮงกว่า หลือมีพะละกำลังหลายกว่า ฝั่งนั้นกะสิเป็นพุซะนะ
Basic vocabulary — page 21 — Series B, pictures 06-09: beer, glass, ice, to drink, drunk
นี้คืออี่หยัง อันนี้คือแก้วเบีย
มีเบียอยู่ในแก้วนี้ มีเต็มแก้วเอาโลด
ขั้นกินเบียนี้ สิเฮ็ดให้เป็นหญัง สิเกิดอี่หยังขึ้น ขั้นคนกินหลายๆ หลือกินเบียเข้าไปหลายๆ มันกะสิเมา
ขั้นกินน้อยๆ มันกะบ่เมา ขั้นกินหลายคัก มันกะสิเมาคัก แล้วแต่คนที่คิดสิกิน
แล้วสีขาวๆ อยู่ในแก้ว หลืออยู่เทิงแก้วนั้น เขาเอิ้นว่าอี่หยัง เป็นฟอง มันเป็นฟองของเบีย
ขั้นเทเบียแฮง หลือเทแฮงๆ มันสิเป็นฟอง เกิดฟองจากเบียนี้หละ สิเฮ็ดให้เป็นฟอง แต่สามาดกะกินได้คือเก่า
แล้วเบียนี้ เด็กน้อยกินได้บ่ กินบ่ได้ เด็กน้อยๆ หนิกินบ่ได้ แต่ว่าขั้นเด็กน้อยที่ใหญ่พอสมควนกะกินได้ แต่ว่ากะบ่นิยมให้กิน พุใหญ่บ่อยากให้กิน แต่ว่าบางคนกะไปลักกิน หลือไปลักพ่อแม่กิน
7
เขากำลังเฮ็ดอี่หยัง เขากำลังเอาน้ำแข็ง กำลังสิเอาน้ำแข็งใส่ในแก้วเบียนั้น
เขาเอาใส่เฮ็ดหญัง ใส่ให้มันเกิดอี่หยังขึ้น เบียอันนี้อาดสิบ่เย็น อาดสิบ่มีความเย็นเลย เขากะเลยสิเอาน้ำแข็งใส่ เพื่อที่สิให้เบียแก้วนี้มันเย็น มันมีความเย็น
บางคนคิดว่า ขั้นกินเบียเย็นๆ มันกะสิแซบ ขั้นเบียมันบ่เย็น มันกะสิขม
8
เขากำลังเฮ็ดอี่หยัง เขากำลังกินอี่หยัง เขากำลังกินเบีย เขากำลังญกแก้วเบียขึ้นกิน
อยู่ข้างหน้าเขาตอนนี้มีอี่หยังแน่ กะสิมีโต่ะ แล้วกะมีขวดเบียพ้อม
เขานั่งอยู่เทิงโต่ะ เอามือวางไว้เทิงโต่ะ แล้วกะมีเบียวางอยู่เทิงโต่ะพ้อมขวดหนึ่ง
แล้วอยู่มือของเขา เขากะถือแก้วเบีย กำลังญกเบียกินพ้อม
9
เขาเป็นอี่หยัง เบิ่งซงแล้วเขาอาดสิเมา
เขากินเบียหลายๆ เขากะสิเมา เพาะว่าเบียมันเป็นแอ็นกอฮอ มันบ่ดี ขั้นกินหลายๆ มันกะสิเมา
เป็นหญังเขาคือเมา เบิ่งซงแล้วเป็นหญังเขาคือเมา เบิ่งแล้วเขากินเบียตั้งบักหลายขวด เขากินตั้งสามขวด เขาอาดสิเมา เพาะว่า เขากินเบียเข้าไปหลายๆ เขากะเลยสิเมา เบียนี้มันสิเฮ็ดให้คนเมา
Basic vocabulary — page 20 — Series B, pictures 16-20: school, student, teacher, to pay respect
นี้คืออี่หยัง อันนี้เป็นโลงเลียน เบิ่งซงแล้วเป็นลักสะนะของโลงเลียน
แล้วเด็กน้อยมาเฮ็ดอี่หยังอยู่โลงเลียน เด็กน้อยนักเลียนมาเฮ็ดอี่หยังอยู่โลงเลียน กะมาเลียนหนังสือ
โลงเลียนเป็นหม้องให้ความฮู้ ขั้นเด็กน้อยมาโลงเลียน กะสิได้ความฮู้ ขั้นบ่มาโลงเลียน กะสิบ่ได้ความฮู้ กะสิปึก
โลงเลียนนี้มีจักซั้น โลงเลียนนี้มีสองซั้น มีซั้นหนึ่งกับซั้นสอง
เสาอยู่ข้างหน้าโลงเลียนนั้นเป็นเสาอี่หยัง เป็นเสาทงซาด ทุกโลงเลียนในปะเทดไทยสิมีเสาทงซาด เป็นเสาเคาลบทงซาดอยู่หน้าโลงเลียน แล้วกะมีทงซาดอยู่เทิงหลักเสานั้นพ้อม
เสาอันนี้กับทงซาดอันนี้เอาไว้เฮ็ดหญัง เอาไว้ยืนเคาลบทงซาด ทุกมื้อเวลาสองโมงเซ้าที่นักเลียนไปโลงเลียน เด็กน้อยต้องมายืนเคาลบทงซาดอยู่หนี้ แล้วกะล้องเพงซาดของปะเทดไทย
17
นี้คือพุใด เขาเป็นพุใด เขาเป็นใผ เขาเป็นเด็กน้อยนักเลียน เป็นนักเลียน
เขาใส่ซุดนักเลียนอยู่ ตอนนี้เขากำลังแต่งซุดนักเลียนอยู่
แล้วเขาถืออี่หยังอยู่ เขาถือกะเปา เป็นกะเปาถือ เป็นกะเปาถือของนักเลียน
18
นี้คือพุใด อันนี้เป็นเด็กน้อยนักเลียน เป็นเด็กน้อยนักเลียนพุหญิง
เขาใส่ซุดอี่หยังอยู่ เขาใส่ซุดนักเลียน พุหญิงสิใส่ซุดนักเลียน แล้วกะใส่สิ้นพ้อม เป็นสิ้นกะโปงนักเลียน
แล้วในมือของเขานั้นถืออี่หยังอยู่ ถือกะเปานักเลียน เป็นกะเปานักเลียน เขากำลังถืออยู่
19
นี้คือพุใด อันนี้เป็นคู เป็นอาจาน
คูมีหน้าที่เฮ็ดหญัง คูมีหน้าที่สอน สอนหนังสือเด็กน้อยนักเลียน ให้นักเลียนมีความฮู้ ให้เด็กน้อยเลียนหนังสือเก่งๆ แล้วกะซ่อยบอกซ่อยสอนเด็กน้อยนักเลียน ให้เป็นคนดี แล้วกะตั้งใจเลียน
เห็นดำๆ อยู่ข้างหลังอาจานนั้นเป็นอี่หยัง เป็นกะดานดำ เอาไว้เขียน หลือเอาไว้สอนนักเลียน
สีขาวๆ ที่เขียนอยู่นั้นคืออี่หยัง เป็นซ่อก เอาไว้เขียนลงไปในกะดานดำนั้น ให้มันเกิดโตหนังสือ หลือให้เกิดสิ่งที่เฮาสิสอนลงไปในนั้น
20
เด็กน้อยนักเลียนกำลังเฮ็ดอี่หยัง กำลังไหว้อาจาน กำลังทำความเคาลบอาจาน
เขาเฮ็ดเฮ็ดหญัง เขาไหว้อาจานเฮ็ดหญัง เขากะไหว้เพื่อที่สิทำความเคาลบอาจาน
เด็กน้อยนักเลียนทุกคนที่อยู่ในโลงเลียนนั้น ขั้นพ้ออาจานคนใด ต้องไหว้ หลือสะหวัดดีอาจาน เพื่อทำความเคาลบ
Basic vocabulary — Page 29 — Series B, pictures 06-07: ring, gold, to put on
อันนี้คืออี่หยัง อันนี้เป็นแหวน
เป็นแหวนทอง แหวนสีทองพ้อม เบิ่งลักสะนะแล้วกะอาดสิเป็นแหวนทองเลยเนาะ
แล้วแหวนทองนี้มีลาคาแพงบ่ กะแพงอยู่ กะแพงเติบเนาะ กะบ่แพงปานใด กะแล้วแต่ เขาเอิ้นว่าหญังเกาะ น้ำหนักทอง ลูบแบบทอง ขั้นน้ำหนักหลายกะแพง น้ำหนักหน้อยกะบ่แพง
ตอนนี้เนาะกะอาดสิแบบว่า บาทหนึ่ง เขาเอิ้นว่าบาทหนึ่ง กะสิลาคาอยู่ปะมานสองหมื่นบาทเนาะ
น้อยกว่าบาทหนึ่งกะสิมีสามสะหลึง สองสะหลึง แล้วกะหนึ่งสะหลึง แล้วกะเคิ่งสะหลึงเนาะ กะสิตามลาคาลงไป
เคิ่งบาทหลือว่าสองสะหลึงกะสิอาดปะมานหมื่นหนึ่ง สามสะหลึงกะสิปะมานหมื่นห้า ปะมานนั้นเนาะ ลาคาแล้วแต่ปะลิมาน แล้วแต่จำนวนของทองมันเนาะ
ทองหนิกะสิเป็นลาคาที่บ่แพงส่ำเพ็ด ขั้นเพ็ดกะสิลาคาแพงไปอีกลาคาหนึ่ง ทองกะสิลาคาพอปะมานที่เว้าไปเนาะ
7
เขากำลังเฮ็ดหญัง เบิ่งจากลักสะนะแล้วเขากำลังใส่แหวน ใส่แหวนทอง
กะสิมีมือพุหนึ่ง จับแหวน กำลังสิใส่ หลือว่าอาดสิเป็นมือของเขาเทิงสองข้าง อาดสิเป็นพุเดียวกัน กำลังใส่แหวนไปอีกข้างหนึ่งของเขาเนาะ
อาดสิเป็นฝั่งขวากำลังใส่แหวน แล้วอีกมือข้างซ้ายกำลังสิสุบแหวนไปใส่มือข้างขวา
เขาใส่แหวนเข้าไปในนิ้วใด เขาใส่แหวนเข้าไปในนิ้ว นิ้วนางเนาะ เขาเอิ้นว่านิ้วนาง คนกะสิมีห้านิ้ว มีนิ้วโป้ นิ้วซี้ นิ้วกาง นิ้วนาง นิ้วก้อย เนาะ
กานใส่แหวนกะสิมีกานบ่งบอกถึงสองลักสะนะ หลือว่าสองวิทีนำกันเนาะ ขั้นเขาใส่แหวนอยู่นิ้วนางกะสิหมายถึงว่าเป็นกานหมั้น หมั้นที่สิก่อนแต่งงาน ขั้นสมมุดว่ามีผัวเมีย สองคนเนาะ กำลังสิแต่งงานกัน แต่ว่าบ่ทันได้แต่ง หมั้นกันก่อน เพื่อที่ว่าสิไปแต่งงาน แต่ว่าในตอนนี้คือหมั้นกันก่อน กะสิใส่แหวนอยู่นิ้วนางเนาะ
แต่ว่าขั้นมื้อใดสองคนนี้อยากสิแต่งงานกัน อีกสองสามเดียนไปข้างหน้า ปากดว่าฮอดมื้อสองสามเดียนนั้นแล้ว สิแต่งงานกัน สมมุดว่าฮอดมื้อนี้ปึ่บ สิแต่งงานกันมื้อนี้ กะสิใส่แหวนนิ้วก้อย อันนั้นกะสิหมายถึงว่าขั้นแต่งงานกันกะใส่แหวนนิ้วก้อย ขั้นหมั้นกันให้ใส่แหวนนิ้วนาง
Basic vocabulary — Page 32 — Series B, pictures 08-10: motorbike, horn, loud, TV, pick-up truck, drum
อันนี้คืออี่หยัง กะมีเหดกานหนึ่งเนาะ มีเหดกานหนึ่งอยู่ในโทละทัดเนาะ กะมีคนหนึ่งกำลังเบิ่งโทละทัดอยู่เนาะ อยู่ในบ้านของเขานั้นหละ
กะมีคนอยู่ในโทละทัดนั้น กำลังขับมอเตอไซอยู่ มอเตอไซ มอเตอไซสีเขียว ขับคนเดียวนั้นหละ ใส่หมวกพ้อม เสียงดังซ้ำแมะ เสียงดัง อาดสิ เขาเอิ้นว่าอี่หยังเกาะ เบิ้นแฮงเนาะ เบิ้นคันเล่งแฮง กะสิเป็นลดคันขี่เสียงดังคัก ปะมานนั้นเนาะ หลือว่าสิบีบแกกะได้ บีบแก ติ่กๆๆๆๆ เสียงดังเนาะ
9
มีคนคนหนึ่งเขากำลังเฮ็ดหญัง กะมีคนหนึ่ง เขากำลังขับลดเนาะ เป็นลดพิกอั่บ ลดพิกอั่บคันบักใหญ่เอาโลด คันสีแดง
เขากำลังขับไปเลี้ยยๆ เลี้ยยๆ ของเขานั้นหละ เบิ่งท่าทาง เบิ่งมือของเขาแล้วกำลังหมุนพวงมาลัยอยู่ แล้วกะเบิ่งลักสะนะ หลือว่าเหดกานตอนนั้น เขากำลังบีบแก บีบแกเสียงดังซ้ำแมะ
แล้วเป็นหญังเขาต้องบีบแก อาดสิมีเหดกานบางสิ่งบางอย่างที่เพื่อเตือนสะติคนที่อยู่ข้างๆ หลือว่าคนที่อยู่นอกลด หลือว่าคนที่อยู่ข้างหน้านั้น เพื่อที่ว่าให้บอกเหดกานบางสิ่งบางอย่าง หลือว่าเป็นกานแจ้งเตือนว่าให้หลบไปหลือว่าให้ลี้ไป ปะมานนั้นเนาะ แล้วกะบีบ บีบแกใส่เขาเนาะ
หลืออาดสิมีคนที่อยู่ข้างหน้าขับลดแบบบ่ดี ขับลดที่บ่ดี กะสิเป็นกานเตือนกะได้เนาะ บีบแก กะสิเป็นกานเตือนอีกแบบหนึ่งว่าให้เฮ็ดอีกแบบใหม่ ให้เฮ็ดดีกว่านี้ ปะมานนั้นเนาะ
10
เขากำลังเฮ็ดหญัง กะมีพุซายพุหนึ่งเนาะ กำลังตีกอง
ตีกองใซ้มือสองข้างเขานั้นหละ ข้างหนึ่งกะจับไม้กอง ข้างหนึ่งกะจับไม้กอง เทิงข้างซ้ายข้างขวา กำลังตีกองปะโล่งโป่งเป่ง ตีกองอยู่พุเดียวของเขานั้นหละ
แล้วเขาตีกองเฮ็ดหญัง เขากะอาดสิม่วน หลือว่าอาดสิมีกิดจะกัมบางสิ่งบางอย่างที่ต้องใซ้กองตี เพื่อที่ว่าสิมีกานล้องเพงกัน แล้วเขากะอาดสิตีกอง
แล้วกองนี้มันเสียงดังบ่ กานตีกองนี้กะเสียงดังพอสมควนเนาะ กะเสียงดังเติบ แล้วแต่ว่าแฮง เฮาสิตีค่อย ตีแฮง ตีเบา ตีบ่เบา ตีแฮงส่ำใด กะดังส่ำนั้น ตีค่อยส่ำใด กะค่อยส่ำนั้น
แล้วตีกองหนิมันม่วนบ่ กะอาดสิม่วนอีกแบบหนึ่งเนาะ อาดสิว่า อาดสิเป็นแบบว่าตีให้มันเข้าจังหวะกานล้องเพง หลือว่าทำนองเพงหนะตอนนั้นเนาะ กะตี ตีม่วนกะม่วน พุใดตีเป็นกะม่วน ตีบ่เป็นกะบ่ม่วนส่ำนั้นหละเนาะ
Basic vocabulary — Page 27 — Series B, pictures 16-18: car, to overtake, motorbike, boat
ตอนนี้กำลังเกิดอี่หยังขึ้น กะมีลดสองคัน คันหนึ่งสีเหลียง กับอีกคันหนึ่งสีแดง กำลังขับอยู่เทิงถะหนนหลือว่าอยู่เทิงหนทางเนาะ
กะมีคันหนึ่ง คันสีเหลียง ขับอยู่เลนซ้าย อยู่ฝั่งซ้าย ขับซ้าๆ หนึ่งดอก
กะมีอีกคันหนึ่ง คันสีแดง ขับบักเล็วหนึ่ง ขับเพื่อที่สิแซงลดคันสีเหลียงที่ขับอยู่ฝั่งซ้ายเนาะ
ลดคันสีแดงนี้กะขับออกขวา ออกขวามาเพื่อที่สิแซงลดคันสีเหลียงอยู่ฝั่งซ้าย
ลดคันสีแดงนี้ขับเล็วบ่ กะขับเล็วเติบ เพาะว่าขั้นขับซ้ากะแซงคันข้างหน้าบ่ได้ ขั้นขับเล็วจั่งสิแซงข้างหน้าได้
17
ตอนนี้เกิดอี่หยังขึ้น กะมีลดอยู่สองคัน ขับอยู่เทิงหนทาง
กะมีลดคันหนึ่งสีเหลียง เป็นลดเก็งเนาะ แล้วกะอีกลดคันหนึ่ง คันสีแดง เป็นลดมอเตอไซ กำลังขับแซงกัน
กะมีลดคันหนึ่งดอก เป็นลดเก็ง ขับซ้าๆ ดอก ขับบ่ฟ้าว ขับซ้าๆ หนิหละ
แล้วกะมีลดอีกคันหนึ่ง เป็นลดมอเตอไซเนาะ มีคนขับคนเดียว กำลังแซงลด ลดเก็ง ขับแซงขวาพุ้นแหล้ว แซงออกขวาพุ้นหละ แซงท่วนๆๆๆ ไป
เขาขับเล็วบ่ มอเตอไซเนี้ย กะเล็วเติบ เบิ่งซงแล้วเป็นตาขับเล็วเติบ
ขั้นมอเตอไซขับเล็วหนิ มันอันตะลายบ่ มันตาย้านบ่ กะอันตะลายเติบ ตาย้านคัก ตาย้านคักอี่หลี เพาะว่ามอเตอไซมันบ่ป้องกันเนาะ ขั้นขับ มีอุบะติเหดกะสามาดตาย หลือว่าเสียซีวิดได้ เพาะสะนั้นแล้วกะต้องขับซ้าๆ แต่ว่าคนนี้อาดสิฟ้าว
แล้วตอนนี้เขาใส่หมวกกันน็อกบ่ เบิ่งซงแล้วอาดสิใส่หมวกกันน็อกพ้อม ใส่หมวกกันน็อกอยู่เทิงหัวของเขา
18
คนสองคนนี้เขากำลังเฮ็ดหญัง คนสองคนนี้เขากำลังขับเลีย หลือว่าพายเลียอยู่
กะมีคนหนึ่งกับอีกคนหนึ่ง คนหนึ่งขับเลีย พายเลียสีแดง อีกคนหนึ่งพายเลียสีเขียว กำลังแข่งกันพุ้นแหล้ว เบิ่งซงเบิ่งลักสะนะท่าทางแล้ว กำลังแข่งกัน
คนหนึ่งขับสีแดงกะขับซ้าๆ ขับไปซ้าๆ ขับบ่เล็วหลาย อาดสิขับบ่เก่งเนาะ
กะมีอีกคนหนึ่ง ขับคันสีเขียว คือสิขับเก่ง คือสิขับถะหนัด หลือว่าฮู้จักวิทีกานขับ หลือว่ากานพายเนาะ กะพายไปบักเล็วหนึ่ง ท่วนๆๆๆ ไปแซงหน้าคันสีแดงไป แซงออกซ้าย เออ แซงออกขวาพุ้นหละเนาะ
แล้วพายเลียหนิพายอยู่ใส หลือว่าขับเลีย หลือว่าพายเลียหนิพายอยู่ใส อยู่ในน้ำเนาะ เลียมันกะต้องขี่อยู่ในน้ำ หลือว่าพายอยู่ในน้ำ
แล้วเลียหนิมันขี่อยู่เทิงดินได้บ่ บ่ มันพายอยู่เทิงดินบ่ได้ จักสิมันไปจั่งใดเนาะ ญู้เอาติ ญู้เอาคือลดติ
Basic vocabulary — Page 01 — Series B, pictures 04-10: cat, to sit, to jump, chair, to sleep, to eat, fish, to walk, to look at, bird
นี้คืออี่หยัง อันนี้เป็นแมว แมวโตหนึ่ง ตาฮักๆ
แล้วแมวมันเฮ็ดอี่หยังอยู่ มันกำลังนั่งอยู่ มันนั่งอยู่สะหนามหญ้า มันนั่งอยู่โตเดียวข้อหล้อ
มันมีหางของมันพ้อม หางของมันญาวๆ ญาวบักคักหนึ่ง
5
แมวโตนี้มันกำลังสิเฮ็ดหญัง แมวโตนี้มันกำลังสิกะโดด มันสิกะโดดขึ้นโต่ะ จักว่ามันสิกะโดดไปเฮ็ดหญัง
มันกะโดดจักโต มันกะโดดโตเดียว โตเดียวข้อหล้อของมันนั้นหละ กำลังญกขาหน้า กำลังญกขาหน้าสิกะโดดขึ้นไปเทิงโต่ะ มันอาดสิกะโดดขึ้นไปนอน หลืออาดสิกะโดดขึ้นไปเหล้นกะได้
แล้วโต่ะที่มันสิกะโดดขึ้นนั้นสูงบ่ บ่ บ่สูงปานใดดอก ขั้นมันสูงมันกะสิกะโดดขึ้นบ่ได้ ขั้นมันสูงหลายมันกะบ่สามาดกะโดดขึ้นไปได้
6
แมวมันกำลังเฮ็ดหญังอยู่ แมวมันกำลังนอนหลับอยู่ นอนเป็นตามีแฮงๆ มันนอนอยู่เทิงโต่ะนั้นหละ โต่ะที่มันหัวแต่กะโดดขึ้นไปนั้นหละ
โต่ะอันนี้กะพอดีๆ พอดีกับโตมันเอาโลด มันกะได้นอนพอดี โตมันกะส่ำโตพอดี นอนเป็นตามีแฮงหลาย กำลังกนก้อกๆ อยู่พุ้นหนะ
7
แมวมันกำลังเฮ็ดหญัง มันกำลังกะโดด มันกะโดดลงพื้น
วั่งหั้นมันอยู่เทิงโต่ะ มันกะเลยสิกะโดดลงพื้น หลือว่ากะโดดลงจากโต่ะ
แล้วมันกะโดดเล็วบ่ หลือว่ากะโดดไวบ่ จักคือกัน กะสิไวอยู่นั้นหละ มันอาดสิฟ้าวกะโดดลงกะได้ จักว่ามันสิไปใส มันอาดสิบ่อยากอยู่เทิงโต่ะนี้แล้วกะได้ มันกะเลยสิกะโดดลงไป
8
แมวมันเฮ็ดหญังอยู่ มันกำลังกินปา มันกำลังกัดกินปาอยู่
มือของมันเทิงสองข้างกำลังจับปาอยู่ แล้วปากของมันกะกัดปาขึ้นมากิน เป็นตาแซบหลาย คือสิแซบคัก
ปากะโตบักใหญ่หนึ่ง มันคือสิมีความสุขหลายที่มันได้กินปาโตนี้
9
แมวโตนี้มันสิญ่างไปใส จักคือกัน จักว่ามันสิญ่างไปใส
เห็นแต่มันญ่างไปข้างหน้าอยู่ จักว่ามันสิญ่างไปใส จักสิญ่างไปทางพุ้น หลือญ่างไปทางพี้ เฮากะบ่ฮู้คือกันเนาะ
แมวโตนี้เบิ่งซงแล้วเป็นตามีความสุขบ่ หางมันกะซี้โก่งโด่งอยู่พุ้นหนะ เป็นตามีความสุขหลาย
10
แมวมันกำลังเฮ็ดอี่หยัง มันกำลังแนมขึ้นฟ้าพุ้นหนะ
แล้วมันแนมไปเฮ็ดหญัง มันแนมเบิ่งนก มันอาดสิเห็นนกโตหนึ่งอยู่เทิงฟ้า มันกะเลยแนมขึ้นไปกะได้ มันอาดสิอยากกินนกโตนั้นกะได้ มันกะเลยแนมขึ้นไป
นกโตนั้นกะกำลังบินอยู่เทิงฟ้าพุ้นหนะ แมวโตนี้กะได้แต่แนม แล้วกะแนมเบิ่งซื่อๆ เฮ็ดหญังกะบ่ได้ กะได้แต่แนม
Basic vocabulary — page 16 — Series B, pictures 11-14: to swim, fish, duck, turtle
นี้คืออี่หยัง นี้คือปา ปาอยู่ในน้ำ ปาโตบักใหญ่หนึ่ง
ปามันกำลังเฮ็ดหญังอยู่ ปามันกำลังหว้ายน้ำอยู่ มันกำลังหว้ายน้ำอยู่ในน้ำ มันกำลังหว้ายไปข้างหน้าอยู่
อะวัยยะวะของปามีอี่หยังแน่ มีส่วนใดแน่อยู่ในโตล้างกายของปา กะสิมีคีบพ้อม มีเหงียกพ้อม มีปากพ้อม แล้วกะมีตา มีหาง แล้วกะมีลำโต บางโตกะมีเก็ดพ้อม บางโตกะบ่มีเก็ด
ปามันใซ้ซีวิดอยู่ใส ปามันใซ้ซีวิดอยู่ในน้ำแม่นบ่ แม่น ปามันใซ้ซีวิดอยู่ในน้ำ ขั้นมันอยู่เทิงบกมันกะสิตาย ขั้นมันอยู่ในน้ำมันจั่งสิมีซีวิด หลือมีซีวิดลอดนั้นหละ
12
เขากำลังเฮ็ดหญัง เขากำลังหว้ายน้ำอยู่ พุซายคนนี้เขากำลังหว้ายน้ำอยู่ เขาหว้ายน้ำอยู่ในน้ำ
จักเขาหว้ายอยู่ใส อาดสิหว้ายอยู่ในทะเล หลือหว้ายอยู่สะหว้ายน้ำกะได้
เขาหว้ายอยู่กับใผ พุซายคนนี้เขาหว้ายน้ำอยู่กับใผ เขาหว้ายพุเดียว เขาอยู่พุเดียวของเขา คือสิบ่มีหมู่ เขากะเลยหว้ายน้ำอยู่พุเดียว
13
นี้คืออี่หยัง นี้คือเป็ด
เป็ดมันกำลังเฮ็ดหญังอยู่ มันกำลังลอยน้ำอยู่ มันกำลังลอยน้ำอยู่ในน้ำ จักมันลอยน้ำอยู่สะใด ฮู้แต่ว่ามันกำลังลอยน้ำอยู่ในน้ำอยู่
เป็ดมันเป็นโตจั่งใด เป็ดมันโตค้ายๆ กับนก หลือค้ายๆ กับไก่นั้นหละ
ปากเป็ดมันกะสิเป็นเปๆ เป็นใหญ่ๆ ปากเป็ดมันเป็นสีส้ม บ่เป็นสีดำคือไก่
เป็ดบ่สามาดบินได้คือนก เป็ดสามาดบินได้หน่อยเดียว บินได้บ่สูงหลาย บินได้ต่ำ บินบ่ได้สูงคือนก
14
นี้คืออี่หยัง นี้คือเต่า
เต่ามันกำลังเฮ็ดหญังอยู่ เต่ามันกำลังหว้ายน้ำอยู่ มันกำลังหว้ายน้ำอยู่ในน้ำ มันหว้ายอยู่โตเดียวนั้นหละ มันใซ้ขาของมัน กำลังหว้ายน้ำอยู่ในน้ำอยู่
มันหว้ายน้ำอยู่ใส จักคือกัน จักว่ามันหว้ายน้ำอยู่ใส ฮู้แต่ว่ามันหว้ายอยู่ในน้ำนั้นหละ
มันหว้ายอยู่ใต้น้ำ หว้ายอยู่ใต้ๆ น้ำ หว้ายอยู่ลึกๆ เผี้ย บ่ได้หว้ายอยู่สูงหลาย
อะวัยยะวะของเต่าสิมีอี่หยังแน่ มันกะสิมีขาพ้อม มีสี่ขา เต่ากะสิมีหางพ้อม แล้วกะมีหัวพ้อม มีปาก มีตา คือๆ กันกับนก กับหญังนั้นหละ แต่ว่าเต่ามันสิแตกต่างจากโตอื่น เพาะว่ามันสิมีกะดองพ้อม มีกะดองอยู่เทิงหลังของมัน เอาไว้ถ้าหลบซ้อน หลือเสี่ยงโตของมัน เสี่ยงหัว เสี่ยงขาของมัน
ญามเกิดเหดล้ายใดๆ มันสิเข้าไปหลบซ้อน ไปเสี่ยงโตอยู่ในกะดองของมัน
เต่ามันเป็นสัดเคิ่งบกเคิ่งน้ำ มันสามาดอยู่ในน้ำกะได้ สามาดอยู่เทิงบกกะได้ มันบ่คือปา มันสามาดใซ้ซีวิดอยู่ในน้ำกะได้ ใซ้ซีวิดอยู่เทิงบกคือกันกับสัดโตอื่นกะได้
Basic vocabulary — page 18 — Series B, pictures 14-17: motorbike, petrol gauge, petrol station
นี้คืออี่หยัง นี้คือมอเตอไซ
มอเตอไซอันนี้เอาไว้ถ้าเฮ็ดหญัง เอาไว้ถ้าขี่ เอาไว้ถ้าขับนั้นหนะ เอาไว้ถ้าเดินทาง เอาไว้ถ้าขี่ไปข้างหน้า
มอเตอไซคันนี้นั่งได้จักคน กะนั่งได้หลายคนอยู่ นั่งได้สองคน สามคน สี่คนกะได้ แล้วแต่สิอัดกันไป แล้วแต่สินั่ง แล้วแต่สิขี่
มอเตอไซคันนี้มีสีอี่หยัง มอเตอไซคันนี้มีสีซมพู
ลดมอเตอไซต้องคือกันเบิดบ่ บ่ ลดมอเตอไซบ่คือกัน แล้วแต่ลุ้น แล้วแต่ยี่ห้อ
บางลุ้นกะสีส้ม บางลุ้นกะสีดำ บางลุ้นกะสีขาว บางลุ้นกะสีแดง แล้วแต่ยี่ห้อ แล้วแต่ลุ้นมัน
มอเตอไซแต่ละคันมีส่วนปะกอบบ่ กะมีอยู่ มอเตอไซกะมีส่วนปะกอบหลายอย่าง
แต่ละอย่างกะแตกต่างกันออกไป มอเตอไซกะมีล้อพ้อม ล้อเอาไว้ถ้าหมุน เอาไว้ถ้าแล่นไปข้างหน้า
เบกมอเตอไซกะเอาไว้ถ้าเบก ญามขี่เล็วๆ หลือมีเหดอี่หยังกะต้องเบก
มอเตอไซกะมีกะจกพ้อม มีไฟพ้อม กะจกเอาไว้ถ้าแญง เอาไว้ถ้าแญงส่องไปทางหลัง ไฟกะเอาไว้ถ้าส่องไฟ หลือแญงไฟไปข้างหน้า
ส่วนปะกอบของมอเตอไซกะมีอีกหลายสิ่งหลายอย่าง เฮากะบ่สามาดเอ่ยถึงได้ไปอีกเนาะ
15
นี้คืออี่หยัง นี้คือเกน้ำมัน เป็นเกบอกน้ำมัน หลือเป็นแนวบอกน้ำมันนั้นหละ ว่าน้ำมันเฮามีบ่ ว่าน้ำมันเฮามีบ่ หลือหลายปานใด หลือน้อยปานใด เฮากะสามาดเบิ่งอยู่หม้องนี้ได้
ตอนนี้ลดคันนี้มีน้ำมันบ่ บ่ ตอนนี้ลดคันนี้บ่มีน้ำมันเลย
ขั้นลดมีน้ำมัน เข็มอันนี้กะต้องหมุนไปทางขวา หลืออยู่ฝั่งขวามือ
เพาะสะนั้นแล้ว ลดคันนี้บ่มีน้ำมัน มันจั่งหมุนมาทางซ้าย
ขั้นลดคันนี้บ่มีน้ำมัน เขาต้องเฮ็ดจั่งใด เขากะต้องไปเติมน้ำมัน ไปเติมน้ำมันอยู่ปั้มน้ำมัน หลืออยู่หม้องที่มันมีขายน้ำมัน
16
นี้คืออี่หยัง นี้คือปั้มน้ำมัน หลือถังน้ำมัน เป็นปั้มน้ำมันนั้นหละ
ปั้มน้ำมันอันนี้เอาไว้เฮ็ดหญัง เอาไว้ถ้าเติมน้ำมัน พุใดอยากเติมน้ำมัน กะสามาดมาเติมอยู่หม้องนี้ได้
ลดคันใดๆ อยากเติมน้ำมัน กะต้องมาเติมอยู่หนี้
ลดใหญ่ หลือลดน้อย กะซ่าง ต้องมาเติมอยู่หนี้
ปั้มน้ำมันกะมีหลายที่หลายหม้อง อยู่หม้องนั้นกะมี อยู่หม้องนี้กะมี แล้วแต่ ขั้นอยู่หม้องนั้นมีถะหนนใหญ่ๆ หลือลดผ่านหลายๆ เขากะสิเฮ็ดปั้มน้ำมันไว้หั้น
17
เขากำลังเฮ็ดหญัง เขากำลังเติมน้ำมัน
อันนี้เป็นพะนักงาน เขากำลังเติมน้ำมันให้ลดมอเตอไซคันนี้อยู่
เป็นหญังเขาคือเติมน้ำมัน กะเพาะว่าลดคันนี้บ่มีน้ำมัน เขากะเลยเติมน้ำมัน เพื่อที่สิให้ลดคันนี้แล่นได้ หลือขี่ไปทางหน้าได้
ขั้นลดคันนี้บ่มีน้ำมัน ลดคันนี้กะแล่นไปข้างหน้า หลือขี่ไปข้างหน้า หลือใซ้งานบ่ได้เลย
แล้วเขาเติมน้ำมันใส่ใส กะเติมน้ำมันใส่ถังน้ำมัน ลดคันนี้มีถังน้ำมันพ้อม เพื่อที่สิเก็บน้ำมันไว้ในถังนั้น เพื่อที่สิใซ้งานได้ ให้ลดคันนี้ใซ้งานได้ หลือขี่ไปข้างหน้าได้
Basic vocabulary — page 15 — Series B, pictures 05-08: to sell/buy, fish, bottle, shirt
เขากำลังเฮ็ดหญัง มีพุซายสองคน เขากำลังสิซื้อสิขายปากัน
มีพุซายคนหนึ่ง ใส่เสี้ยสีเขียว ใส่เสี้ยแขนสั้นดอก กำลังถือเงินอยู่ กะถือเงินหลายเติบ ถือเงินแบ้งสีเขียว
เงินแบ้งสีเขียวเป็นใบสี่เหลี่ยม มีหลายเติบ มีหลายใบพ้อม
เขาใซ้มือข้างซ้ายของเขา กำลังจับเงินอยู่ เงินกะหลายแบ้งอยู่ หลายใบนั้นหละ
เขากำลังสิซื้อปาของอีกพุซายคนหนึ่ง
แล้วกะมีอีกพุซายคนหนึ่ง ใส่เสี้ยสีซมพู เสี้ยแขนสั้นคือกันนั้นหละ เป็นคอปกพ้อม
เขากำลังถือปาอยู่ เขากำลังสิเอาปามาขาย เพาะว่าเขาถือปามาขาย เขาคือสิอยากขายปาบักคักหนึ่ง
เพื่อที่สิได้เงิน เพื่อที่สิเอาเงินไปใซ้จ่ายในสิ่งต่างๆ
แล้วพุใดอยากขายปา กะคนที่ถือปานั้นหละ เขาอยากขายปา
แล้วพุใดอยากซื้อปา กะคนใส่เสี้ยสีเขียวนั้นหละ คนที่เขาจับเงินอยู่ เขาอยากซื้อปา
เขาอาดสิเอาปาไปเฮ็ดแนวกิน เป็นแนวกินกินกับเข้าของเขากะได้
6
เขากำลังเฮ็ดหญัง เขากำลังสิซื้อสิขายปากัน
มีพุซายสองคนนี้หละ เขากำลังสิซื้อสิขายปากัน
พุซายใส่เสี้ยสีเขียว เขากำลังซื้อปาของพุซายอีกพุหนึ่ง ที่ใส่เสี้ยสีซมพู
พอเขาสิซื้อสิขายกันแล้ว พุซายใส่เสี้ยสีเขียว เขากะเอาเงินให้พุซายใส่เสี้ยสีซมพู แล้วเขากะเอาปาไป
แล้วพุซายใส่เสี้ยสีซมพู เขากะได้เงินไป
7
เขากำลังเฮ็ดหญัง เขากำลังซื้อขวดน้ำ
มีพุซายใส่เสี้ยสีเขียว เขากำลังมาซื้อขวดน้ำ
จักเขาสิซื้อเป็นหญังกะบ่ฮู้
อันนี้จักเป็นขวดอี่หยังกะบ่ฮู้ แต่ว่าเป็นขวดแก้ว เป็นขวดอี่หยังกะบ่ลู้ จักอี่หยังอยู่ข้างในขวดนั้น อันนี้กะบ่ลู้คือกัน
แล้วพุซายใส่เสี้ยสีเหลียงเขากำลังเฮ็ดหญัง เขากำลังคิดเงิน เขากำลังขายขวดให้พุซายคนนั้นหละ ให้พุซายที่ใส่เสี้ยสีเขียวนั้นหละ แล้วเขากำลังคิดเงินอยู่
คิดเงินว่าขวดนี้ลาคาจักบาทๆ แล้วเขากะเอาเงินจากพุซายใส่เสี้ยสีเขียวมา
แล้วเคี่ยงสีเทาๆ หนี้ เป็นเคี่ยงอี่หยัง เป็นเคี่ยงคิดเลข หลือเคี่ยงคิดเงินนั้นหละ เพื่อที่สิเช็คลาคาว่า คนนี้ๆ ซื้อของจักบาทๆ
แล้วกะคิดเป็นจำนวนเงินออกมา ว่าคนพุนี้ซื้อของไปจักบาทๆ แล้วเขากะเก็บเงินจากพุนั้นมา
8
เขากำลังเฮ็ดหญัง เขากำลังสิซื้อสิขายเสี้ยกัน
มีพุซายพุหนึ่ง เขากำลังสิซื้อเสี้ยจากพุหญิงคนนั้น คนนั้นอาดสิเป็นแม่ค้ากะได้
เป็นพุหญิง ใส่เสี้ยสีฟ้า ใส่เสี้ยแขนสั้นสีฟ้าดอก อาดสิเป็นแม่ค้า
มีกะเปาเงินมัดอยู่ข้างหน้าพ้อม
เขากะผมญาวหลายเติบ กะบ่ญาวหลาย
กำลังเก็บเงินจากพุซายคนนี้อยู่ เพาะว่าเขากำลังซื้อเสี้ยจากพุหญิงคนนี้
เสี้ยผ้าสามาดซื้อได้อยู่ใส สามาดซื้อได้หลายที่หลายหม้อง เสี้ยผ้าสามาดซื้ออยู่ห้างกะได้ ซื้ออยู่ตะหลาดนัดกะได้ ซื้ออยู่ใสกะได้ หม้องที่มันมีล้านขายเสี้ยผ้า หาซื้อได้บ่ญาก หาซื้อได้ง่ายๆ หนึ่ง